اليوم بيجري منك؟ إلحقه وزود الإنتاجية مع جوبزيلا

4725

عمرك حسيت انك عندك شغل كتير عايز تخلصه، بس الوقت قليل جدا؟ عمرك حسيت ان كل يوم بيجري، و انت مش بتقدر تخلص اللي وراك ولا تحقق اهدافك؟ معظم الموظفين بيمروا بأوقات بيحسوا فيها أنهم مضغوطين ومتوترين، و ده بيقلل من طاقتهم و انتاجهم في الشغل. بس من الناحية التانية، ناس قليلة جدا بتعرف ازاي تزود انتاجية يومها و تحقق أهدافها في الشغل. عشان كدة جوبزيلا بتقدملك عشر عادات ممكن تساعدك أنك تحقق اكتر في شغلك و تزود نجاحك وترفع معدل الإنتاجية بصورة عامة.

1- مارس رياضة كل يوم.

حاول تخصص وقت محدد من يومك عشان تمارس فيه رياضة. وأيا كان نوع الرياضة اللي هتمارسها، اهم حاجة انك تحافظ على لياقتك و صحتك البدنية. ممارستك للرياضة كل يوم وخاصة الصبح، بيزود نشاطك و بيديك طاقة عشان تبدأ بها يومك. بس الأهم من كدة، انه بيزود قدراتك و بيقوي عقلك عشان تقدر تخلص شغلك بنجاح و في الوقت المحدد.

2- اعمل روتينك الخاص، والتزم به.

كل مهني ناجح عنده حياة منظمة و بيتبع روتين محدد، عشان ينظم أيامه و يزود انتاجيته في الشغل. لما بتعود نفسك انك تلتزم بجدول محدد، ده بيساعد عقلك أنه يفهم شغلك و الواجبات اللي وراك، و بالتالي هيساعدك تلتزم بها و تنجز مهامك في وقتها. ومن ناحية تانية، ولان انت اكتر شخص فاهم نفسك، انت الوحيد اللي تقدر تحدد انت ممكن تعمل مهامك امتى و ازاي. ولانك عارف نقاط قوتك و نقاط ضعفك، هتقدر ترسم خطة لنفسك عشان تنجح في شغلك و تزود انتاجيتك.

3- اكتب قائمة باللي لازم تعمله، وكمان اللي مش لازم تعمله.

الحل عشان توصل لاهدافك و تحقق اللي وراك، هو انك تعرف المهام اللي عليك و ترتبها حسب الأولوية. التنظيم مهم جدا لانه بيساعدك تفضل مركز و بيوجهك لأحسن طريق يوصلك للنجاح و بإنتاجية عالية. وعشان تعمل كدة، لازم تكون عارف و متابع كل المشاريع و الشغل اللي وراك و تنظمه في خطة أسبوعية، و شهرية، و سنوية (لو ينفع)، ومن خلال الخطة ده اكتب قائمة بالشغل اللي لازم تخلصه، و جددها كل يوم. من ناحية تانية، انك تكتب قائمة بالحاجات اللي مش لازم تعملها، ده طريقة مسلية و مفيدة، ممكن تساعدك انك تقلل من نقاط ضعفك  و تزود إنتاجيتك في شغلك. القائمة ده هتتضمن العادات السيئة اللي بتمنعك من انك تحقق طموحاتك، أو بتقلل من سرعة إنجازاتك، أو حتى بتضيعلك وقتك. مهم انك تخلي الورقة ده على طول قدامك، عشان تفكرك دائما بالعادات اللي لازم تبطلها، و بالتالي يزيد نجاحك و تزيد إنتاجيتك في الشغل.

4- متوافقش على كل الشغل اللي بيجيلك.

كل موظف بيكون عايز يبقى الأحسن و يخلي اللي حواليه يحبوه، و عشان يبسط مديره، ساعات بياخد شغل او مشاريع كتير في نفس الوقت. وده بينتج عنه انه بيكون مضغوط جدا، و بيتوتر عشان مش واثق انه ممكن يخلص في الوقت المحدد، وكمان انتباهه بيتشتت عشان الشغل الكتير اللي عليه. والضغط ده بيقلل من جودة الشغل اللي بيقدمه الموظف، وكمان بيخلي إنتاجيته تقل. وبعد فترة، الموظف هيتعب و طاقته هتستهلك فمش هيقدر يشتغل زي الأول، و ده ممكن يوصله لأنه يكره شغله. عشان كده لازم تعرف قدراتك و حدود إمكانياتك، و تختار الشغل اللي تقدر تعمله بجودة عالية وفي الوقت المحدد.

5- خد فترات للراحة.

بغض النظر عن قد ايه انت مشغول، او وراك مهام كتير محتاج تخلصها، لازم تاخد فترات للراحة في يوم عملك. ممكن تقسم يومك لوحدات، زي مثلا ساعة ونص شغل، و عشر دقائق راحة، أو خمس دقائق راحة كل ساعة، أو حتى ممكن تاخد راحة واحدة بس لمدة نص ساعة أو ساعة خلال يومك. أيا كانت الطريقة اللي هتقسم بها يومك، أهم حاجة هي أنك توقف عقلك و جسمك عن الشغل لفترة بسيطة، عشان تقدر ترجع تركز في الشغل من جديد. ممكن تستغل فترة الراحة في انك تتمشى شوية، أو تمارس رياضة سريعة، او تعمل مكالمات خاصة، او حتى تاكل وجبة خفيفة. أيا كان اللي هتعمله في وقت راحتك، أهم حاجة انك تبعد تفكيرك تماما عن شغلك، و اللي مطلوب منك تعمله.

Productivity-Ar-Infograph

6- حط لنفسك مواعيد محددة.

جزء مهم من روتينك اليومي او من جدول مهامك اليومية، انك تحط لنفسك مواعيد محددة. مثلا، انك تقابل مديرك الساعة واحدة الضهر عشان تكلمه عن مشروعك، أو مثلا تحدد انك تخلص ثلاث مهام قبل الساعة خمسة. المشكلة اللي بتحصل لما مبتابعش الوقت و مبتحطش مواعيد لنفسك، هي أنك بتحس ان لسة في وقت كتير، و ده بيخليك تأجل شغلك لبعدين. في النهاية، وقتك بيضيع، و مبتحققش اللي وراك. ومن ناحية تانية، لما بتحدد اهداف قصيرة المدى، و بتحط مواعيد محددة لنفسك، كدة بتكون مهني اكتر ومنظم اكتر في شغلك، و ده بيحافظلك على و وقتك و مجهودك.

7- متشتغلش في اكتر من حاجة في نفس الوقت.

التركيز هو عنصر مهم جدا عشان تبقى موظف ناجح ومنتج اكتر. لانك لما بتشتغل على حاجات كتير في نفس الوقت، ذهنك و عقلك بيتشتتوا، و وقتك و مجهودك بيضيع، وفي نفس الوقت مبتخلصش شغلك. أحسن حل عشان تشتغل صح هو أنك تركز في مهمة واحدة بس، تخلصها خالص، و بعدها تنتقل للمهمة التانية. اهتم بكل مهمة لوحدها، و هتلاقي نفسك بتحقق اكتر بنجاح اكبر و في وقت اقل.

8- متكونش مثالي بزيادة .

انك تسعى وراء الكمال و المثالية في شغلك ده حاجة كويسة، لكن انك تكون مثالي بزيادة بيصعب سير الشغل. بمعنى اخر، انت كموظف لازم تؤدي شغلك بشكل كامل، لكن ده مش معناه ان كل مهمة، حتى ولو كانت صغيرة، لازم تخلص بمثالية. الشغل الكامل هو اللي بيخلص بمجهود كبير عشان يجهز في الوقت المحدد. ولما الموظف بيكون مثالي بزيادة، غالبا مبيركزش على الشغل كله، و بيخلي اهتمامه على الحاجات او المهام الصغيرة اللي ممكن تكون مش ضرورية. بالتالي بيضيع وقته و مجهوده، و غالبا مبينجزش شغله عشان بيكون شاكك في قدرته انه يشتغل صح. متخليش سعيك للكمال و المثالية يشل حركتك، و يخليك تشك في قدراتك، وبدل ما تفكر بالطريقة ده، كن واثق من نفسك و مصر على انجاز الشغل، و متخافش من انك ترتكب غلطات، بس المهم انك تتعلم منها عشان تحسن شغلك في كل مرة.

9- اخلق بيئتك الخاصة من غير اي حاجة تشتتك.

خليلك مكان خاص بك تقدر تفكر فيه بحرية و تزود من إنتاجيتك في شغلك. المكان ده ممكن يكون كافيه أو مكتبة قريبة من الشغل، المهم انه يكون مكان مفيهوش اي حاجة تشتتك، و يسمحلك انك تسرح مع عقلك وخيالك. في بعض الموظفين بيرتاحوا اكتر في مكاتبهم، وده كويس بردو. اهم حاجة انهم ينظموا مكتبهم و يعرفوا ازاي يشتغلوا صح عشان ينجحوا و يحققوا اكتر.

10- اشرب مياه و متنساش تاكل.

كتير من الموظفين بينشغلوا باللي وراهم لدرجة انهم بينسوا يهتموا بنفسهم. و انت كموظف عشان تعرف تشتغل لساعات طويلة، لازم تاكل صح و تشرب مياه على طول. و كمان عشان تقدر تحافظ على طاقتك و صحتك و بالتالي إنتاجيتك في الشغل.

الوقت بيعدي بسرعة، و معظم الناس مبتلحقش تخلص شغلها، و الضغوط اللي عليها بتستهلك طاقتها، و ده بتخلي إنجازهم يقل. لكن انت ممكن تتفادى ده، و تخطط صح لشغلك من خلال انك تعرف نقاط قوتك و ضعفك، و تتبع عادات صحية و جديدة تساعدك انك تحقق اهدافك و توصل للنجاح.

بتواجه اي نوع من المشكلات اللي عرضناها؟ بتتصرف أو بتتصرفي ازاي؟ إحكيلنا قصصك في أي وقت وجوبزيلا هتساعدك. هتلاقينا على جوبزيلا ، فيسبوك، تويتر،إنستاجرام، يوتيوب أو بينترست.

In this article

Join Conversation