كيف تخلق موظفين أوفياء في شركتك؟ أهم نصائح جوبزيلا

5506
موظفين

كل شركة وكل مجال عمل بيهتم أنه يكبر و يحقق نجاح. عشان كدة بيهتم بانه يطور ماركته، ومنتجاته و خدماته، و بيحاول يحافظ على زبائنه و عملائه. وده بيخليهم يعملوا خطط، و يحضروا مؤتمرات، و يدوروا على شركاء يساعدوهم يوصلوا للنجاح و يحققوا اكتر. لكن للاسف، غالبا مبينتبهوش لاهم شريك لازم يحافظوا عليه، وهو موظفينهم. لما اي شركة بتواجه مشاكل او اوقات صعبة، اول حاجة بتعملها هي انها تطرد بعض الموظفين و تقلل حجمها عشان تكسب اكتر. بس هي في الحقيقة بتحقق مكاسب لفترة قصيرة، و بعد كدة بتكتشف انها خسرت اهم ثروة كانت عندها، وهي موظفينها. دراسات مختلفة اكدت ان لما شركة تنجح في انها تخلي موظفينها مخلصين لها ده يعتبر اهم استثمار ممكن تعمله، لان ده اضمن طريق يحقق للشركة تطور مستمر و نجاح على المدى البعيد. عشان كده، جوبزيلا بتقدملك احسن ست طرق ممكن تساعدك تخلي موظفينك مخلصين لشركتك و مبسوطين في الشغل معاك.

استثمر وقت اكتر في مرحلة اختيار الموظفين.

عملية اختيار الموظفين بتمثل خطوة مهمة جدا لمستقبل الشركة، زي ما مهم انك تكتب مهمة او رؤية الشركة، و تخطط لاهدافها. وانت كمدير مش بس بتختار اي شخص عشان يقوم بمهام محددة، لكن بتنقي واحد يقدر يساعد في تطوير الشغل و تحسين الشركة. انت بتدور على احسن المرشحين وبتقيمهم على اساس مؤهلاتهم اللي هتضيف للعمل الجماعي بتاع الشركة، و تطور اساليبها و استراتيجياتها. فاول خطوة عشان تبقى مدير ناجح، هي انك تختار بعناية الموظفين اللي ممكن تأتمنهم على شغلك، وتكون واثق انهم يقدروا يؤدوا وظائفهم بشكل كامل، و كمان يغلبوا توقعاتك. مش مهم لو عملية التوظيف اخدت وقت اطول، لان ده استثمار هيفضل يفيدك و يفيد شركتك لوقت طويل.

حسس الموظفين الجداد انهم بينتموا للشركة.

لما الموظف يحس انه بينتمي للشركة، و انه جزء من الشغل و فريق العمل، هيهتم بشغله اكتر، و هيكون عايز يقدم افضل ما عنده عشان يحسن من الشغل وجودته. عشان كده لازم يحس انه مرحب به، وانك كمديره و الموظفين التانيين مهتمين انكم تفهموه الشغل و ثقافة الشركة. وده هيخلي الموظف يفهم انه عنصر مهم في الشركة، و بالتالي شغله هيأثر عليه و على النجاح اللي هيحققه الشغل. و من ناحية تانية، هيفهم ان نجاحه من نجاح الشركة، و ده هيخليه يبذل مجهود اكبر، احيانا اكتر من المطلوب، عشان يحقق اهدافها.

خلي موظفيك من اهم و اول أولوياتك.

من مميزات المدير الناجح انه بيخلي موظفينه يحسوا انه بيقدرهم و بيقدر شغلهم. ولازم يحسسهم بردو انه مهتم بهم و مستعد انه يقدم لهم المساعدة في اي وقت يحتاجوها. وده هيخليهم يحسوا انهم مهمين و قيمين للشركة، و بالتالي هيشتغلوا احسن عشان يتطوروا معها. من ناحية تانية، صحيح ان لما الشركة تطور خدماتها و منتجاتها باستمرار، الزبائن و العملاء هيفضلوا معها و يخلصوا لها، كمان الموظفين المخلصين بيلعبوا دور مهم جدا في انهم يحافظوا على العملاء. بمعنى اخر، لما الموظفين يحسوا بالانتماء للشركة و انها بتهتم بهم، هيزيد و ولائهم لها، و بالتالي هتزيد رغبتهم في انهم يرضوا العملاء و يخلوهم مبسوطين في تعاملهم معها.

شجع التطور المهني، و ساعد في خلق فرص للتقدم في العمل.

نجاح موظفيك هو نجاح لشركتك. عشان كدة لما يتعلموا حاجة جديدة، او يجربوا مشروع جديد او يحصلوا على شهادة اعلى، كل ده بيساعدهم يتطوروا و يؤدي شغلهم بطريقة احسن. والمدير الناجح دائما بيشجع موظفيه انهم يطوروا من مهاراتهم و يقوا نفسهم في مجالهم. مش مهم لو غابوا عن الشغل كام يوم او كام ساعة، لان اللي بيتعلموه ده هيساعدهم يشتغلوا اسرع و بجودة اعلى و هيزود انتاجيتهم في الشغل، وده في الاخر هيفيد الشغل و الشركة. ممكن الشركة توفر بعض التدريبات او الكورسات للموظفين، بس لو مش هتقدر، يبقى لازم تشجع موظفيها على انهم يدوروا على فرص عشان يتطوروا و يتقدموا في شغلهم.

تواصل معاهم و شجعهم على اتخاذ القرارات.

التواصل الجيد يعتبر مفتاح مهم جدا في اي شركة لانه ممكن يمنع حدوث مشاكل كتير، خاصة بين فريق العمل. وبيساعد الموظفين انهم يتعودوا على الشغل و يحسوا بالانتماء للشركة. و عشان تبقى مدير ناجح، لازم تعرف موظفيك بوضع الشركة و تقدمها،و كمان بالمشاكل او العقبات اللي بتواجهها. و لازم تشاركهم في الاجتماعات و المناقشات، بس الاهم، انك تشاركهم في عمليات صنع القرار. ده بيزود اخلاص وولاء الموظفين للشركة، لانه بيديهم احساس بالحرية، و الثقة، و التحكم. بمعنى اخر بيعرفوا انك كمديرهم بتثق في تفكيرهم، و في قدرتهم على اتخاذ قرارات صحيحة تفيد الشغل و الشركة.

كن المدير اللي انت تتمنى تتعامل معه.

من اهم العوامل اللي بتخلي الموظفين يكملوا في شركة و يزيد ولائهم لها، هي ان يكون لهم سند من مديرهم و يكونوا بيثقوا فيه. لما تكون مدير كويس، انت مش بتساعد الشركة تكبر و تنجح بمجهودك بس، لكن كمان بتكون فريق عمل قوي و مخلص، كل عضو فيه بيفيد الشركة و يساعدها تتقدم و يزيد جودتها و انتاجيتها. عشان كدة، حاول دائما انك تسمعهم، وتشجعهم يحققوا انجازات كبيرة، وساعدهم دائما و حسسهم بثقتك، كافئهم على اللي حققوه، وكمان عرفهم على أخطائهم. اهم حاجة افتكر انك بتبني فريق قوي بتعتمد عليه الشركة عشان توصل للنجاح.

في النهاية، موظفينك هم العمود اللي بيسند الشركة، وبيقويها و يوصلها للنجاح، وانت في ايدك القرار انك تقويها و تخليها تحقق اعلى الانجازات. خليك ذكي، و امشي في الطريق الصح اللي هيحققلك النجاح.

إحكيلنا قصصك مع الموظفين في أي وقت وجوبزيلا دايماَ هنا تسمع. هتلاقينا على جوبزيلا ، فيسبوك، تويتر،إنستاجرام، يوتيوب أو بينترست.

In this article

Join Conversation