هل المسمى الوظيفي بيعبر فعلا عن الموظفين اللي أنت محتاجهم؟

13599
المسمى الوظيفي

عمرك قضيت يوم كامل، كصاحب عمل، وأنت بتقابل مرشحين لوظيفة معينة، بس كلهم مكانوش مؤهلين للوظيفة ده؟ عمرك حسيت أنهم مش فاهمين اللي أنت محتاجه في الشركة؟ أو لاقيت معندهمش المهارات و القدرات اللي تساعدهم على أداء الوظيفة صح؟ معظم أصحاب الأعمال ميعرفوش المعلومة ده، بس أحيانا بتكون المشكلة في الطريقة اللي بيطلبوا فيها موظفين. بمعنى أخر، ممكن تكون المشكلة في المسمى الوظيفي اللي هم كتبوه، واللي أدى لأنهم يجذبوا مرشحين مش مناسبين للوظيفة. وعشان كتابة مسمى وظيفي بشكل صحيح حاجة مهمة جدا، جوبزيلا هتعرفك ازاي تكتب واحد، وايه أهميته.

بداية، المسمى الوظيفة هو وثيقة رسمية بتوصف وظيفة معينة، و بتشرح تفاصيلها، وده بيشمل: اسم المنصب، واجباتاه، مهامه، توقعات الأداء، و ازاي بيتقيم. وكمان بيشرح مكان العمل، و مدته و ظروفه. و عشان المسمى الوظيفي بيعتبر عقد أو اتفاق أولي بين صاحب العمل و الموظف الجديد، ده بيخليه خطوة مهمة بتساند شغل قسم الموارد البشرية في الشركة. وعشان معظم الناس مش عارفينأهميته، هنقدملكم فؤائده بالنسبة للأطراف المختلفة في الشركة.

1- أهميته لأصحاب العمل:

– بيساعد الموظفين يوفقوا ما بين مسؤوليات الموظف، و رؤية الشركة و احتياجاتها.

– بيوضح و يسهل طريقة التواصل بين صاحب العمل و الموظف، لأنه بيحدد الحقوق، و الواجبات، و توقعات صاحب العمل عن أداء الموظف.

– بيساعد في تحديد المرتب اللي يستحقه الموظف بناء على شغله و التزامه.

– بيوجه صاحب العمل في عملية اختيار المرشح المناسب للوظيفة.

– بيساعده على تقييم الموظف، و تحديد المكافآت أو العقاب المناسب له.

– و بيساعده كمان على تقسيم الوظائف و المرتبات بعدل بين الموظفين، و ده بيحميه و بيحمي الشركة من قضايا التفريق العنصري أو اتهامات الفصل الباطل.

2- أهميته للموظفين:

– بيحدد بوضوح المهام و الواجبات اللي عليهم، و المهارات و القدرات اللي محتاجينها عشان يؤدوا الوظيفة صح.

– بيشرح أهمية المنصب لشغل الشركة و تقدمها.

– بيساعد الموظف أنه يعرف ازاي الشركة هتخليه يتقدم و يتحسن في مجاله.

– بيساعده يفهم بيئة العمل، و ثقافة الشركة، و ساعات العمل و ظروفه، و توقعات صاحب العمل.

– وأحيانا بيعرف الموظف على قواعد العمل، و ازاي يتعامل مع زملاؤه و مديره.

3- أهميته لنجاح قسم الموارد البشرية في الشركة:

– بيوجههم في عملية تعيين موظفين جدد، من ناحية أنه بيحدد الأسئلة الضرورية في المقابلة، و ازاي يقيموا المرشحين و يختاروا الأفضل ما بينهم.

– بيساعدهم يقيموا الموظفين اللي موجودين، و يحددوا اذا يستحقوا مكافئة أو علاوة.

– بيساعدهم يحتفظوا بسجلات عن موظفينهم في الشركة.

– بيوجه قسم الموارد البشرية و يساعدهم يفضلوا عادلين في قراراتهم.

– ممكن يستخدموه كمرجع عشان يشجعوا الموظفين أنهم يطوروا من نفسهم لو في وظائف أعلى أو علاوات.

عشان كده انك تكتب مسمى وظيفي دقيق، تعتبر خطوة مهمة جدا، بس متقلقش، هي مش صعبة. كل اللي أنت محتاج تعمله هو أنك تطبق النصائح التالية، و تتجنب الأخطاء الشائعة، عشان توصل للموظف المثالي.

نصائح مهمة هتساعدك في كتابة المسمى الوظيفي…

1- لازم يتضمن المعلومات ده:

– اسم المنصب: موقع الموظف في الشركة.

– مخلص عن الوظيف: وده بيكون عبارة عن جملتين أو تلاتة بتشرح فيها فين و امتى الموظف هيشتغل، و مين هيشرف عليه.

– المؤهلات: المهارات المطلوبة عشان الموظف يؤدي الوظيفة بأحسن طريقة ممكنة.

– التعليم والخبرة: الشهادات الجامعية اللي الموظف حصل عليها، و خبرته العملية السابقة.

– واجبات العمل ومهامه، و مسؤولياته: تعريف المطلوب من الموظف و هيعمله ازاي.

– المرتب، والمكافآت و الحوافز.

– القدرات الجسدية والعقلية المطلوبة لأداء الوظيفة.

2- لازم يكون مختصر، و سهل القراءة:

كل ما كان المسمى الوظيفي مختصر و فيه ابداع، كل ما زادت فرصته في أن الناس تقرأه. لكن متخليش ده يأثر على كمية المعلومات و التفاصيل اللي لازم تكتبها فيه. ومن ناحية تانية، حاول يكون المسمى الوظيفي عبارة عن فقرات صغيرة (من 3-4 جمل) و نقاط، عشان تبقى قرأته سهلة.

3- أوصف الشركة، و المبادئ اللي بتقوم عليها:

اوصف الشركة في فقرة صغيرة، و اشرح الدور اللي بتقوم به عشان تجذب انتباه الناس. عرفهم ليه هي حاجة كويسة أنهم يشتغلوا في شركتك، وازاي هيقدروا ينجحوا و يوصلوا لأهدافهم. و بنقترح بردو أنك تضيف المبادئ و القيم اللي بتقوم عليها الشركة، لأن ده بيشجع المرشحين أنهم ينضموا للشركة لو كانت القيم متشابهة. من ناحية، ده هيعرفهم بالمبادئ اللي لازم يلتزموا بها و يحترموها. و من ناحية تانية، ده هيحسسهم بالانتماء لانهم لقوا مكان يتوافق مع أخلاقهم و قيمهم.

4- خالي بالك من اللهجة:

لما تكتب المسمى الوظيفي، حاول تخليه يعكس الوظيفة اللي بتعرضها على قد ما تقدر. على سبيل المثال، الطريقة اللي هتكتب بها المسمى الوظيفي عشان تطلب كاتب أو محرر للشركة، هتختلف عن الطريقة اللي هتكتبه بها عشان تطلب مبرمج كمبيوتر.أحيانا عشان تجذب مرشحين للوظيفة، لازم تكون محاور و لطيف في كتابتك، بس أوعي تفقد مهنيتك. وافتكر دائما أن المسمى الوظيفي هو أول وثيقة بتعرف الموظف على شركتك.

أخطاء شائعة لازم تتجنبها:

1- متكتبش مسؤليات مبهمة، و متكتبش المتطلبات بس:

عشان تجذب المرشحين المناشبين للوظيفة، لازم تكون دقيق جدا وواضح في وصف اللي انت عايزه، و اللي انت عايزهم يعملوه، خاصة لما تكتب مهام وواجبات الوظيفة. من ناحية، ده هيساعد الموظفين أنهم يفهموا كمية العمل و ضغطه، و اللي متوقع أنهم يعملوه. ومن ناحية تانية، ده هيحميك كصاحب عمل، من أنك تواجه مشاكل كتير بسبب سوء التفاهم. نقطة مهمة تانية لازم تركز فيها، هي أنك لما بتكتب متطلبات الوظيفة بس، ده مش بيساعد الموظفين بأي طريقة. الموظف لازم يبقى فاهم كل تفاصيل الوظيفة و المنصب اللي هو مقدم عليه، وانت لازم توفر كل ده في المسمى الوظيفي.

2- متستخدمش مصطلحات و اختصارات متعلقة بمجال العمل:

بعض المصطلحات الخاصة بمجال عملك تعتبر شائعة و بتستخدم كتير، عشان كدة ممكن تكتبها في المسمى الوظيفي لأنها هتعكس المجال اللي المرشحين هيشتغلوا فيه. لكن في نفس الوقت، مينفعش تفترض أن كل المرشحين عارفين كل المصطلحات والاختصارات. أكيد حاجة كويسة أنك تبان مهني و خبير في مجالك، بس متخوفش موظفينك المستقبليين بكلمات هم مش فاهمينها.

3- متعملش أخطاء إملائية و نحوية:

خليك فاكر دائما أن المسمى الوظيفي ده بيعبر عن شركتك. عشان كده لما بترتكب أخطاء نحوية و إملائية، ده بيبنك أنت و الشركة بصورة غير مهنية، و بيخلي المرشحين يحسوا بأنك غير مهتم. عشان كده دائما راجع كل الوثائق و الاعلانات اللي بتكتبها قبل ما تنشرها.

4- متنشرش اعلانات الوظائف بتاعتك في أي مكان:

مهم أنك تنشر إعلانك الوظيفي، و تعرف الناس عشان تجذب مرشحين جداد، بس ركز عشان متدفعشفلوس كتير في أماكن مش هتوصل للناس اللي أنت محتاجهم. بمعني آخر، لو أنت بتدور على مبرمج، على سبيل المثال، مش مستحب أنك تنشر إعلانك في مجلة أزياء.فكر كويس في الأماكن أو الحاجات اللي بيقراها الموظفين اللي أنت محتاجهم، و انشر إعلاناتك فيها، واجذبهم لشركتك.

In this article

Join Conversation