٨ طرق عشان تكون المدير المثالي في شغلك

13039
المدير

سهل جدا انك تبقى المدير المتسلط اللي بيفرض اوامره و بيعوز كل حاجة تمشي على طريقته بدون اي مناقشات او اقتراحات. وبالرغم من ان في موظفين كتير بيحبوا يتلقوا الاوامر وينفذوا اللي مطلوب منهم بدون تفكير، الا انه، انت كمدير، في ايدك انك تقوم بشركتك و تشجع فريقك على النجاح و زيادة الانتاج. بس على حسب نوع المدير اللي انت عايز تكونه، ممكن تحقق تغير ايجابي، وتوصل لجودة اعلى و مناخ محفز اكتر في مكان العمل. جوبزيلا بتقدملك ثمان عادات ممكن تخليك المدير العظيم اللي كل الناس عايزة تشتغل معاه. بمعنى اخر، اعرف ازاي ممكن تكون المدير المفضل عند كل موظفينك و تشجعهم انهم يشتغلوا اكتر و ينتجوا اكتر.

١- اختار موظفينك بعناية واعرفهم كويس

المدير الناجح هو اللي بيسعى ان يكون معاه فريق قوي يشتغل معاه. و بيهتم انه يدرس كل المتقدمين للوظيفة، و يختار لها اكتر شخص مؤهل. و بردو بيعرف نقاط قوتهم و ضعفهم، من خلال سيرتهم الذاتية، و جوابات التقديم، و المقابلات، عشان بعد كده يعرف ازاي يساعدهم يؤدوا وظيفتهم باحسن طريقة ممكنة. فهمك لفريقك بيساعدك انك تتواصل معاهم و تحسسهم انهم مميزين وانك بتهتم بهم. ده بيخلق اخلاص وولاء ليك كمدير، و للشغل، و للشركة، و عشان كده الموظفين بيؤدوا شغلهم بإتقان و حب اكتر. فلما تكون بتعلن عن وظيفة على جوبزيلا، اتاكد انك تكون محدد في كتابة المؤهلات و المهارات المطلوبة، وادرس ملفاتهم الشخصية كويس قبل ما تختار.

٢- كن شغوفا بشغلك و اعرفه كويس.

لو عايز تبقى مدير ناجح، لازم تكون عارف و فاهم كل حاجة عن شغلك و مجالك و تخصصك، لان ده بيخلق شغف و اهتمام بالعمل. وده بيساعدك كمدير اولا، لانك لو واجهت مشكلة بتقدر تحلل الموقف بطريقة صحيحة و توجد حلول. لكن الاهم من كده، ان شغفك بشغلك هيخليك زي الشعلة اللي بتضيف طاقة و حماس للفريق كله. ومن ناحية تانية، ازاي ممكن تطلب من موظفينك انهم يؤدوا شغلهم صح، لو انت مش مهتم به بنسبة مية %. عشان كده، كن شغوف بعملك و انشر الحماس في فريقك، ولاحظ ازاي النجاح و الانتاج بيزيدوا كل يوم في الشغل.

٣- حدد معايير الامتياز و اتاكد ان كل الموظفين عارفينها.

عشان اي سفينة تمشي، لازم كل عامل على متنها يعرف ازاي يشتغل، و ايه هي المعايير اللي لازم يلتزم بها. والمدير الناجح بيحط معايير التميز والجودة و بيدرب موظفينه على تطبيقها. و دايما بتكون المعايير ده في اعتباره لما بيختار موظفينه ولما بيقيم شغلهم. عشان كده لما الموظفين بيعرفوا المعايير ده من البداية، بيهتموا انهم ينفذوها في شغلهم، و احيانا كتير بيهدفوا انهم يحققوا احسن من اللي مطلوب منهم، وده طبعا بيزيد الانتاج و بيحقق جودة اعلى في الشغل.

٤- دايما شجعهم و ثق في قدراتهم.

جزء مهم من انك تعرف موظفينك، هو انك تعرف قدراتهم و امكانياتهم و توزعهم على المهام المختلفة على الاساس ده. في بعض الاحيان، بيحس الموظف انه غير قادر على القيام بوظيفته، وهنا دورك كمدير انك تشجعه و تدفعه للثقة في نفسه. المدير الناجح بيثق في مهارات و مؤهلات فريقه، حتى لو هم شكوا في نفسهم، و بيتحداهم دايما انهم يشتغلوا احسن و يحققوا اكتر. وده بيخلي كل موظف يفهم نفسه اكتر، ويحافظ على نقاط قوته و يحسن نقاط ضعفه. ومن ناحية تانية، ده بيديله الاحساس ان هو مهم فبيشتغل اكتر عشان يثبت نفسه و يزيد نجاحه.

٥- كن عادلا، اهتم بالحوافز ولكن ايضا لا تنسى العقاب.

صحيح انك لما تزود الشغل و المهام على الموظفين، من غير وقت للراحة، هتخلي الشغل يخلص بسرعة. لكن غالبا الشغل هيكون من غير جودة او اتقان، واكيد موظفينك مش هيقدروا يشتغلوا صح لفترة طويلة. و عشان تتجنب حصول ده، لازم تكون عادل. يعني تدي وقت راحة و ممكن اجازات للموظفين اللي بيؤدوا شغلهم كويس، و اشكركم دايما على الانجاز اللي حققوه. ساعتها الموظفين هيحسوا بالتقدير و الاحترام و هيفضوا مخلصين للشركة. من ناحية تانية، لازم تفتكر انك مدير مش صديق، يعني لازم تحاسب الموظفين على أخطائهم. الموظفين كلهم بيحترموا و بيقدروا المدير العادل، حتى لو اتعاقبوا عارفين ان ده حصل لان شغلهم مكنش مطابق لمعايير و قواعد الشغل.

٦- تواصل مع فريقك، و شاركهم في النقاشات و الحوارات.

المدير الناجح بيشرك موظفيه في المشاكل اللي بتتعرضلها الشركة و بيشملهم في عملية ايجاد الحلول. و كمان بيخليهم يحسوا انهم جزء من الشغل و انهم بينتموا للشركة، و عشان كده رأيهم مهم و افكارهم مطلوبة. ومن ناحية تانية، المدير الناجح بيعرف فريقه على رؤية الشركة و اهدافها، و بيشركهم في التخطيط للمشاريع و تطوير الشغل. ومن خلال كل ده، كل موظف بيتاكد انه عمود اساسي في نجاح الشركة، و ان مجهوده سبب في استمرار الشغل.

٧- كن صادق، و قل الحقيقة دائما.

حتى لو كانت الحقيقة بتوجع، أعضاء فريقك من حقهم يعرفوا اذا كانوا بيشتغلوا صح او لو كانوا بيرتكبوا اخطاء. وده جزء من كونك مدير عادل. وكمان مهم انهم يكونوا عارفين اذا كان الشغل ماشي كويس و هم بينجحوا و بيحققوا اهدافهم، او اذا كانوا بيواجهوا مشاكل. انت كمدير بتعرفهم ده لانك بتهتم بفريقك، و عشان هم ممكن يساعدوك و يساعدوا الشركة انكم تحتفلوا بنجاحاتكم، او تساندوا بعض بعد اي فشل. ولانهم بينتموا للشغل و للشركة، فهيبذلوا مجهود، حتى لو بعد ساعات العمل الرسمية، عشان يلاقوا حلول لاي مشكلة.

٨- كن مشجع، وحفزهم على التعلم خاصة بعد الفشل.

عشان انت القائد، فانت عندك الحكمة و القوة انك تحفز فريقك، و تساعدهم يقوموا بعد اي محنة او فشل. لازم تعلمهم ازاي ميستسلموش، وتوريهم انهم ممكن يرجعوا لطريقهم وهدفهم تاني و ينجحوا. وحتى لو حملت كل واحد فيهم نتيجة خطأه، لازم تشجعهم يتعلموا من اخطافهم و يعرفوا ازاي ميعملوهاش تاني و ازاي يطوروا مهاراتهم. قل لهم ان التعليم اولوية، و انهم لو مش بيتعلموا حاجات جديدة حتى لو من اخطائهم، يبقى مش هيتقدموا. ودايما اسمعلهم و شجعهم انهم يحققوا اهدافهم و طموحاتهم.

في النهاية، دايما خالي في بالك انك عندك القدرة انك تقود فريقك و شغلك و شركتك للنجاح و الازدهار، لو عرفت ازاي تبقى قائد ناجح و ذكي، و توري فريقك ازاي يشتغلوا صح، وازاي يتقبلوا الفشل و يتعلموا منه، وازاي ميستسلموش و يشتغلوا جامد و يفكروا صح في انهم يطوروا من نفسهم و يحققوا اهدافهم.

شاركنا تجربتك كمدير على جوبزيلا ، فيسبوك، تويتر،إنستاجرام، يوتيوب أو بينترست.

In this article

Join Conversation