مين قال ان شهادة التخرج كفاية؟

5162

ممكن تكون بتعافر عشان تلاقي شغل بعد التخرج أو أنك تترقى في شغلك الحالي أو أنك تتقبل في شغل جديد في شركة جديدة. أنت مش لوحدك! .. دراستك الأكاديمية مهمه عشان تدلك على أول الطريق بس الأهم من كدة انك تتطور من نفسك عشان قوتك الحقيقة بتكمن فيك أنت وفي قدراتك والشهادة ما هي الا مجرد وسيلة. أستغل وجودك في الجامعة في انك تعرف نفسك أكتر وتكتشف شغفك الحقيقي.

أسباب تخلي شهادتك الجامعية مش كفاية :

  1. زيادة المنافسين في في سوق العمل : معظم الأشخاص فوق 21 سنة حاصلين على شهادة بكالريوس، فبالتالي شهادة الجامعة مبقتش حاجة مميزة زي ماكانت من 15 سنة. معظم المهنيين حاليا بيلجأوا للحصول على الدرسات العليا زي ماجيستير في إدارة الاعمال (MBA) و الماجيستر و بياخدوا دورات مهنية عشان ينموا معرفتهم و يميزوا نفسهم عن غيرهم.
  2. الشركات بتطلب شهادات عليا: أصحاب الأعمال بيشوفوا الشهادات العليا و الشهادات المهنية دليل على قدرات ومؤهلات الموظف المحتمل للمنصب وبالتالي بيطلبوها للوظايف الخالية في الشركة عشان دا بيبقى مؤشر لنجاح الأشخاص دي في المستقبل.
  3. انخفاض متوسط الراتب: عدد حاملين شهادة البكالوريوس في زيادة مستمرة بس فرص العمل المتاحة ليهم مابتزيش بنفس المعدل وبالتالي بتكون قليلة مقارنة بعددهم. مبادئ الاقتصاد بتقول أنه لما يكون العرض أكبر من الطلب الاسعار بتقل ، وفي الحالة دي ” السعر” هو مرتبك.

والحل ايه ؟ الموضوع مش صعب ومتاخدوش على محمل انها نهاية العالم فى السطور الجاية هنتكلم عن الحاجات اللي ممكن تعملها عشان تفضل في دايرة المنافسة في سوق العمل:

  1. خد MBA أو ماجيستر في مجالك.
    الانضمام لبرامج الدراسات العليا هتساعدك تتعلم أكتر عن مواقف واقعية في الشغل وتوسع معرفتك و طريقة تفكيرك و بتتيح ليك تتعرف على ناس جديدة ممكن ينفعوك بعد كدة في مستقبلك المهني. بالإضافة أن وجود شهادة دراسات عليا بيمنحك المعرفة والخبرة اللازمة عشان تزود كفاءة سيرتك الذاتية CV.
    (اضغط هنا علشان تتعرف على نصايح جوبزيلا لكتابة سيرة ذاتية ذكية)
  2. خد دورات مهنية معتمدة.
    وجود شهادة معتمدة من دورات مهنية ليها تأثير كبير في CV بتاعك بالإضافة أنها مهمة لتطوير مهاراتك وعشان تبقى على إطلاع على كل جديد في مجالك. وحصولك على كورسات مهنية بعد الجامعة بتبين أن انت عندك عزيمة و مجتهد وبتسعى للتعلم دايما ودا بالظبط اللي الشركات بتدور عليه في الموظفين. ولو أنت وقتك ضيق ممكن تاخد الكورسات دي عالانترنت وبتكون معتمدة.
  3. قدم في منح تدريبية. 
    لو ملاقتش شغل بمرتب وأنت متخرج جديد، متترددش أنك تقدم في منح تدريبية عشان تكتسب الخبرات وتزود فرصتك في أنك تلاقي شغل مناسب في مجالك بعدين. (جوبزيلا عليها فرص تدريب مختلفة فى كل المجالات متنساش تتعرف عليها).

في النهاية شهادتك الجامعية مفيدة و هتسمحلك أنك تدخل الحياة المهنية حتى لو دا خد وقت أطول من المعتاد. بس الشهادات المتقدمة زي الدراسات العليا والدورات المهنية و المنح التدريبية هي اللي هتأهلك تكمل في حياتك المهنية من خلال تطوير مهاراتك و اكتساب الخبرة اللازمة لمجال شغلك لو مشيت في الطريق الصح اللي هيوصلك لحلمك وطموحك.

In this article

Join Conversation